أشهر وأقوى ١٥ مكان للسحور في القاهرة!


بما ان جملة “يلا نفطر سوا يوم” بقت سيئة السمعة كدة وكلنا عارفين إنها مبتحصلش، ليه منخليش تجمعاتنا في رمضان على السحور؟ كل واحد يكون فطر في بيته وريح شوية وبعدين ننزل ونتجمع في حته لذيذة لغايه الفجر. لو قررتوا، دول ٧ أماكن بتقدم سحور مستواه كويس اوي! 

خيمة ليالينا

احنا متحمسين شوية للخيمة الرمضانية دي. مش بس عشان المكان جوا zed park جديد ومختلف، بس كمان عشان هيبقى فى ناس بتغني وحفلات بتطلع مع السحور. زي فرقة المولوية وفرقة Egyptian Project واكيد غيرهم كتير…

Pyramids Rooftop

المكان ده لطيف جدًا من قبل رمضان بس كمان وقت السحور اكيد هيبقى مختلف عن اي حتة تانية. يعني، مين جرب يتسحر وقت الفجر وشايف الأهرامات قدامه؟ 

فول النور/مطعم السني/ روضة زايد

عايز تتسحر في زايد وأكتوبر بس في أماكن جوها قريب من الأماكن الشعبية؟ عندك فول نور ومطعم السني في الحي الأول وروضة زايد جوا اكتر. معظم الأماكن دي زحمة على السحور بس مش هتستنى الأكل اكتر من ربع ساعة مثًلا.

B.Bistro

لو انت من سكان المعادي أو من محبيها، يبقى انت محظوظ السنادي. عشان كل سبت من رمضان، هتتسحر وانت بتسمع أغاني فرقة Egyptian Project في المكان الجميل ده!

جبل المقطم

في اماكن كتير اوي في المنطقة دي بتقدم سحور كويس. وفي أماكن بتفتح بس وقت رمضان، عشان كدة بننصحك تنزل بنفسك جبل المقطم وتختار المكان والڤيو اللي يعجبك.

تغميسة

طبعًا لسكان التجمع أو نيو كايرو المكان ده غني عن التعريف. احنا مجربناهوش لسة بس ده دايمًا اول اسم بيتقال بعد سؤال نتسحر فين؟ وده بيوضح إنه مميز فعلًا. ياريت الناس اللي جربته تحكيلنا عنه اكتر!

درب شكمبة

من أشهر الناس اللي بتعمل كبدة وسجق في منطقة الدقي والمهندسين. بس كمان السحور عندهم قوي وناس كتير بتروحله مخصوص. اتسحرت هناك قبل كدة؟

طبالي

طبالي من الأماكن المفضلة عندنا وعند ناس كتير للفطار في العموم، فالموضوع مش مفاجأة خالص اننا نهتم بيه في السحور برضو. بس حاولوا متطلبوش دليڤيري بس، الأكل في المكان مختلف تمامًا!

البغل

من أشهر وأقوى محلات الفول والسحور في مصر. مكانه حيوي جدًا في شارع متفرع من القصر العيني وده السبب في موضوع الزحمة الرهيبة هناك كل رمضان!

قهوة

العيش هيتخبز طازة قدامك في الفرن كمان!

كان لازم نزود مكان ليه اكتر من فرع في كذا مكان وبرضو السحور عنده حلو. زي ما قهوة مميز اوى في الفطار، السحور عندهم  لذيذ اوي برضو ومتنوع. اختار أقرب فرع ليك وجربه قريب!

بطاطساية وعم بشندي

سكان مدينة نصر يمتنعوا عشان اكيد اكلوا في الأماكن دي لما شبعوا. عم بشندي وطاطساية هما احسن مكانين تتسحر فيهم في مدينة نصر ومصر الجديدة بلا منازع. بس هتقدر تستنى دورك وتستحمل الزحمة؟

عيش وجبنة

الحقيقة مينفعش نعمل ليست عن السحور وميبقاش فيها عيش وجبنة. المكان ده كله حاجه فيه حلوة، حرفيًا. جربناه فطار وغدا سحور ودايمًا مبهر. كانوا قافلين السحور بس اول يومين علشان العاملين في المكان يكونوا مع أهلهم اول رمضان بس دلوقتي الخدمة مفتوحة تاني. 

دسوقي أند سودا

كل حتة زحمة اوي ومش عارف تتسحر فين في مكان قريب؟ هو واحد بناجأله في المواقف دي. ليه اكتر من فرع في كذا مكان، دايمًا بيخترع ويفنن في أنواع الفول والطعمية والطواجن عنده حكاية!

لو عجبك أي مكان من دول متنساش تكلمهم قبلها بشوية تحجز عشان الضغط في طول الشهر كبير جدًا. هاه قولولنا، بتحبوا تتسحروا منين؟





Source link

Leave a Reply

Your email address will not be published. Required fields are marked *