مشاهيرمصريين بنحس إنهم من العيلة


الدنيا مريبة شوية كده كده وبما إننا عايشين في مصر فإحنا المفروض متعودين عليها بكل غرابتها، وإحنا الصراحة متعودين لدرجة إننا مش بنستغرب إن في مشاهير كتير في مصر بنتعامل معاهم على أساس انهم جزء من الأسرة علشان هما فعلًا بيفكرونا بناس كتير نعرفها

دلوقتي طبعًا إنت غالبًا مش عارف تقتنع بالفكرة علشان مشاهير إيه اللي بيفكرونا بأهالينا بس؟ دول في حتة وإحنا في حتة تانية خالص وتمام يعني، والصراحة دي نقطة تحترم وكل حاجة بس لو شوفت إحنا قصدنا ميين بالظبط هتلاقي التشبيه في محله

خالد الصاوي

بذمتك مش بتحس خالد الصاوي حد تعرفه؟ والله فكر فيها شوية، كل الفيديوهات اللي بيعملها ورقصات الأفراح اللي بيبدع فيها هتخليك حاسس إن ده خالك الغريب شوية بس فرفوش أوي

منى الشاذلي

إدينا فرصة بس نشرحلك — هو مش لما منى الشاذلي بتجيب أي ضيف مش بتحس إن الضيف ده متوتر وفي أسئلة كتير مش عايز يرد عليها بس كده كده جيه البرنامج كنوع من المجاملة؟

أهو هو ده نفس تأثير عمتك الحشرية، هي طيبة وكل حاجة بس مشكلتها إنها لو حابة تعرف حاجة هتجيبها على حساب راحتك النفسية

كريم عبدالعزيز

زي ما عندك خالك الفرفوش خالد الصاوي فانت برده عندك عمك اللي تقريبًا كده والله أعلم ميعرفش انك موجود على وش الدنيا وديه نفس طاقة كريم عبدالعزيز بالظبط

هو غالبًا مش قصده بس هو بيختفي فترات طويلة لدرجة إنه والله بيوحشنا بس أحلى حاجة إنه كل فين وفين بيرجعلنا بفيلم…مش زيه عمو اللي مش فاكرك فكل شوية يسأل إنت في سنة كام وانت بقالك خمس سنين متقاعد أصلًا

يسرا

بص هي يسرا مش جزء من العيلة زي الباقيين على قد ما هي صاحبة العيلة من زمان أوي، عارف انت طنط اللي دايما موجودة فأي مناسبة وأي عزومة متشيكة ومدياك وش إنها أروش من أي طنط في القعدة؟ أهو هي دي يسرا

مفيدة شيحا

من غير ما تقول، مفيدة شيحا لا تلقائيا هتفكرك بخالتو الروشة بشكل أوفر شوية

أصل زي خالتك هي شخصية فرفوشة وبتحب تهزر (لو خالتك مش كده يبقى أكيد عندكم قريبة كده) و دائما بتحب تغوص في النقاشات الحادة ويا سلام لو الموضوع قلب بخناقة عالضيق كده

محمد صلاح

من غير لف ولا دوران محمد صلاح عامل بالظبط زي ابن خالتك اللي العيلة كلها بتقارنك انت وقرايبك بيه…حتى لو قرايبك من ناحية أبوك ولله، ربنا بيكون منجحه في حياته وانت بتكون فرحان ليه والله بس برده بيكون نفسك ماتسمعش عن إنجازاته كلها مرة واحدة في أي قعدة مع العيلة

محمود سعد

ماتخيلتش انك هتلاقيه هنا صح؟ بس والله ديه أكتر حاجة منطقية، أصل انت لو شوفت محمود سعد عالتلفيزيون قريب أو من زمان فانت خدت بالك انه الراجل ده شبه حد من قرايبك

عارف قريبك اللي دايما بيجي وياخد فنجان قهوة مظبوط ويقعد يحكي في القصص القديمة والجديدة والغريبة؟ أهو هو هو محمود سعد بالملي

عبلة كامل

ماهو مش هينفع نعمل ليستة عن مشاهير بنحس انهم من العيلة ومانحطش عبلة كامل، إحنا شوفنالها حاجات كتير أوي زمان لدرجة إننا شايفينها طنط قريبتنا اللي بتحب تعمل عزومات وتحلف انك مش هتقوم من غير ماتخلص أكلك

مين تاني حاسه جزء من الأسرة؟





Source link

Leave a Reply

Your email address will not be published. Required fields are marked *