١٠مواقف الستات بتحكيها عن التحيز الجنسي في التشخيص الطبي!


بعد واقعة الدكتور اللي اعترف أنه خيط مريضة بدون بنج عشان “تتربى”، ستات كتير، وكمان رجالة بدأوا يعترفوا قد إيه في تحيز جندري من الجهات الطبية ضد الستات. تحيز وحكم عام بينتهي بأن حالات كتير بتتشخص أنها بتتوهم أو بتتخيل المرض ومش بيتقدملهم الفحص والتشخيص الشامل بسبب أنهم ستات مش رجالة. 

(Gender Biased Diagnosis)

هل ده موجود حقيقي؟ جمعنا شوية آراء ومواقف مختلفة تثبت صحة الكلام ده. مع العلم أن ده مش هجوم على الكوادر الطبية، ده مجرد نقاش مفتوح ونقد وكشف لبعض الحالات الفردية.

“الدكتور قال لجوزي دي بتتدلع و معندهاش حاجة، وأنا كنت بعاني من أعراض ما بعد الكورونا” 

كلام الدكتور ساعتها وجعني أكتر من ألمي الجسدي. 

“الدكتورة قالتلي أنتي بس بتحاولي تلفتي الإنتباه”

كام ست سمعت الجملة دي من كام دكتور زارته في حياتها؟ وعلى فرض، مش من حق دكتور يحكم على مريض بالشكل الفج ده حتى لو ثبت أنه بيحاول يلفت الانتباه. 

“قربي بس من ربنا وأنتي هتخفي وتبقى كويسة”

مثال كمان على قلة المهنية الطبية. حضرتك طبيب ولا شيخ؟

“أنا كنت بعالج إصابات حرب، أنتي معندكيش حاجة أنتي بتدلعي”

للأسف برضو بنشوف صفة الغطرسة والتكبر على الحالات البسيطة من دكاترة كبيرة في المجال.

“أنتى مزوداها أوي” 

كلمة تانية أكيد كل ست سمعتها على الأقل مرة في حياتها من الطبيب المعالج.

“مش هعملك العملية لأنك لسه بنت( عذراء)، هكتبلك أدوية احسن” 

الدكتور رفض ياخد رأيي في قرار هاخده في جسمي أنا، وقرر يبقى وصي عليا وياخد الطريق الأسهل حتى لو فيه ضرر ليا.

“حصلي تشنجات حرارية من الكورونا، الدكتور وهو بيكشف عليا اتعصب وزعقلي وسابني ومشي”

احنا مقدرين الضغط اللي الدكاترة بتتعرض ليه وظروف شغلهم الصعبة. بس يعني ايه طبيب معالج يتقمص ويسيب المريضة ويمشي؟

“الدكتور رفض يسمع بشتكي من إيه، كشف عليا بالسماعة وبعدين قال لمامتي مفيهاش حاجة. وإتضح بعد كده أني عندي مشاكل في الأذن الوسطى”

في ظاهرة كدة أن الدكاترة مش بتستنى تسمع المريض ولا شكواه وبتاخد الإجراء الروتيني على طول. مهما كنت دكتور متمرس وصاحب خبرة، في بروتوكول معين وجزء منه احترام المريض.

“شعري كان بيقع في إيدي كله وبيطلعلي حبوب في فروة الرأس من الحجاب والدكتور قرر يكلمني عن الإبتلاء والقضاء والقدر” 

مثال تاني لدكتور قرر يبقى شيخ وواعظ ديني. طب المفروض المريض يثق في أي كلمة تخرج من حضرتك إزاي؟

“فضلت سنين اسمع من الدكاترة إني بستهبل وبتدلع وأنا كنت بعاني لغاية معرفت إني عندي حمى البحر المتوسط. وفي فترة مكنتش بعرف افتح بوقي ولا أتاوب ولا أشرب وبرضو الدكتور قال لأهلي يتجاهلوني وطلع عندي dislocation في الفك”

“بتدلع، بتستهبل، تجاهلوها” دي كلها عبارات وألفاظ مش المفروض أبدًا تطلع من طبيب محترم. دي أكبر علامة على عدم المهنية والتخاذل.

وصم المريض بأي شكل من الأشكال هو شيء مرفوض تمامًا. حتى لو الفحص بين عدم وجود أي أعراض والطبيب شك أنها مشكلة نفسية مش عضوية، في برضو بروتوكول للتعامل مع الحالات دي. 

أحنا مقدرين ومتفهمين اللي دكاترة الطوارئ بيتعاملوا معاه كل يوم، بس لو حضرتك حسيت الموضوع برا تخصصك، تقدر تحول المريض للجهة الطبية المعنية. بس التهاون والاتهامات غير مقبولة أبدًا. 

وأخيرًا، نتمنى أي ست متقبلش التهوين من مشاكلها وآلامها من أي شخص. ولو تم وصمك أو تجاهلك طبيًا، من حقك تقديم شكوى مباشرة في الدكتور المعالج.





Source link

Leave a Reply

Your email address will not be published. Required fields are marked *