٥ أمثلة لـ ازاي كلمة “السمعة” بتتحكم في حياة البنت المصرية والعربية!


يعني ايه السمعة؟ كلمة السمعة في كل حتة في العالم وفي كل قواميس الدنيا يعني الأخلاق والنزاهة والضمير. ومعاني تانية كتير ملهاش أي علاقة بجسم الست. إلا في مجتمعاتنا العربية. 

” الشرف” أو “السمعة” كلمات عمرك ما هتسمعها في أي مجتمع متقدم أو حتى قعدة متحضرة. إلا في سياق النقد، طبعًا. جرائم الشرف والسمعة لسه جزء اصيل في مجتمعاتنا العربية. حتى في ٢٠٢١، دي حقيقة بنات وستات كتير حياتهم بتدمر بالكامل بسببها وبسبب كلمة بيساء استخدامها بكل الأشكال ضد المرأة. 

وديه ٥ أمثلة لأزاي كلمة “السمعة” بتتحكم في حياة الست المصرية والعربية.

“مفيش بنات محترمة ترجع البيت متأخر. البنت سمعة”

الجملة اللي معظم بنات مصر سمعوها كتير في مراحل حياتهم ولسه بيسمعوها، غالبًا. يعني انتي لازم تظبطي مواعيدك وشغلك وتحركاتك اليومية على مواعيد المجتمع والناس شايفين انهم مناسبين ليكي. مش لسلامتك مثًلا وخوفًا عليكي لشخصك. توء توء توء، عشان سمعتك.

“اخوكي الولد يضربك ويربيكي عشان تمشي عدل والناس ماتتكلمش”

معروف إن المجتمع المصري مجتمع أبوي. والسلطة فيه والتحيز بيكون للذكور. يعني، اخوكي ممكن يبقى بيتأخر وبيبات بره عادي بس محدش هيتكلم معاه. لو فكرتي حتى تعبري عن رغبتك في ده، هيحصل إيه؟ 

” زوج يتهم زوجته بجريمة شرف للتنازل عن حقوقها”

هنروح بعيد ليه؟ من فترة قريبة كلنا شوفنا الخبر ده. زوج حبس مراته واتهمها بالزنا تحت قانون جريمة الشرف. بس تحقيقات النيابة ظهرت إن الزوج كذاب وإنه عمل كده بس عشان تتنازل عن حقوقها الزوجية. يعني حتى القانون في ثغرات ممكن تسمح لأي راجل يستغل كلمة “شرف” عشان يدمر حياة إنسانة.

“لازم نسأل عالعروسة ونعرف أخلاقها الأول”

لا، الجملة ديه مش بس موجودة في المسلسلات والأفلام. في الواقع كمان فيه عائلات لازم تسأل عالعروسة قبل ما تتقدم. لحسن تكون بتروح متأخر ولا حاجة. طبعًا البواب والجيران اكتر ناس هتعرف ده كويس.

“وفاة فتاة شابة بسبب جريمة شرف”

القتل. وازاي وأد البنات أيام الجاهلية بيرجع في أبهى صورة في القرن الواحد والعشرين. في ناس بتقتل بناتها اللي من لحمها ودمها عشان خرجت مع شاب أو مارست معاه علاقة خارج إطار الجواز. طب لما الولد في العيلة هو اللي بيعمل كده مش البنت، بيحصل معاه ايه؟

وعشان كده لازم نبطل نستخدم الكلام ده ونمحي المصطلحات المسيئة والعنيفة ديه من حياتنا. ونبطل كمان نربط بين شرف البنت وأبوها وأخوها وخالها وعمها. البنات مش كائنات فاقدة للأهلية ومحتاجة وصي. شرف البنت في تصرفاتها ونزاهتها وإنسانيتها في الحياة بشكل عام.





Source link

Leave a Reply

Your email address will not be published. Required fields are marked *