٥ حاجات ماتعمليهاش مع صاحبتك اللي لسه مخلفة جديد!


أي واحدة لسه مخلفة جديد حياتها بتبقى عبارة عن بامبرز كتير، نوم قليل، وكميات مهولة من الشاي والقهوة. دماغها هتبقى مشغولة بمليون حاجه بتعملها أو بتحاول لسه تعملها. عشان كده، آخر حاجة هي محتاجاها منك كصديقة انك تزودي عليها الحمل ده بأي شكل من الأشكال. 

وعلشان كده، هنفكرك بخمس حاجات تتجنبي تقوليها أو تعمليها لصاحبتك اللى لسه مخلفة جديد!

ماتجيبيش هدية للبيبي وتنسيها هي!

احنا فاهمين إن جرت العادة إن اللي بتخلف جديد بنجيبلها حاجه دهب او لبس أطفال وهكذا للبيبي..

بس فكري فيها كده، لو انت اللي لسه مخلفة جديد وقعدتي ٩ شهور تعبانة ومحرومة من حاجات كتير هتبقى عايزة الناس تدلعك وتجيبلك هدايا ليكي انتي كمان. أصل حرام يعني!

ماتعلقيش على وزنها!

مهما كان وزنها زايد بلاش خالص نعلق عالوزن. هي اكيد عارفه ومضايقة إن وزنها زايد بس ده طبيعي ومش بإيديها. بلاش كلام من نوعية “إلحقي نفسك بقى و ماتسبيش نفسك كده” خااالص!

بعد الولادة على طول كمان الجسم بيكون لسه منفوخ شوية وبياخد وقت على ما يرجع لطبيعته. ممكن برضه تبقى خست كتير بعد الولادة، فبلاش نقولها شكلك تعبان او مرهق.

بلاش نفرض عليهم تجربتنا الشخصية

لو انت كمان مخلفة وعندك أولاد، بلاش اول حاجه تعمليها معاها هي نقل تجربتك الشخصية بكل حذافيرها والافتراض إن هي بس الصح. كل أم ليها تجربة خاصة. وهي لما تحتاج مساعدتك في حاجة اكيد مش هتتردد تسألك.

الأهم من بترضع ازاي أو بتستخدم بامبرز نوعه إيه، إنك تسأليها عن صحتها النفسية بعد الولادة. شوفي مودها عامل ازاي واتكلمى معاها في الحاجات اللي بتضايقها وبتقلقها. صدقيني، هتقدرك جدًا.

“دي أحلى لحظة في حياتك، استمتعي بيها”

هي اكيد عارفة ده كويس، بس هي لسه بتتعرف عالطفل المولود ده زيها زيكم. في وسط ضغوطات فترة ما بعد الحمل، بلاش نحسسها إنها محتاجة تهدى وتستمتع بكل لحظة. عشان صدقيني، هي مش هتعرف تعمل ده خالص في المستقبل القريب.

بلاش نقفش لو ماعرفتش تخرج كتير

طبعًا دي المفروض بديهيات. بس للأسف، في ناس بتزعل من  صحابهم اللي خلفوا جديد بسبب الموضوع ده. يعني إيه مش عارفة تخرجي مرة في الأسبوع؟ طب سيبيه عند مامتك…

احنا مانعرفش إيه اللي بيحصل عندهم في الظرف الجديد ده. ومانعرفش برضه، ممكن تبقى صاحبتك عندها اكتئاب ما بعد الولادة مثلاً أو مش متقبلة وزنها الجديد. أو أي حاجة تانية!

بنفكركم وبنفكر نفسنا برضو ويابخت من زار وخفف!





Source link

Leave a Reply

Your email address will not be published. Required fields are marked *